7 мая 2026
5 мая 2026 года ў Расонскім раёне Віцебскай вобласці, у рамках турыстычнага злёту «Промні надзеі» для людзей з інваліднасцю, адкрылася новая інклюзіўная экалагічная сцежка «Падарожжа ў прыроду без перашкод».
Экалагічная сцежка працягласцю 6 кіламетраў пачынаецца недалёка ад цэнтра экалагічнага выхавання ДПУ «ЭКА-РАСЫ» і праходзіць па асабліва ахоўнай прыроднай тэрыторыі. Яна прапануе пазнавальны і гульнявы фармат знаёмства з прыродай Беларусі. На маршруце размешчаны 17 тэматычных прыпынкаў з інтэрактыўнымі заданнямі, пазнавальнымі стэндамі і зонамі адпачынку. Госці могуць прайсці экасцежку з «пашпартам вандроўцы», выконваць заданні і збіраць адзнакі, што робіць шпацыр цікавым для дарослых і дзяцей.
Адмысловая ўвага нададзена даступнасці: частка маршруту адмыслова адаптаваная для людзей з інваліднасцю і ўлічвае запатрабаванні наведвальнікаў з парушэннем апорна-рухальнага апарата, якія слаба бачаць ці невідушчых, з парушэннем слыху, а таксама для людзей з засмучэннем аўтыстычнага спектру. Тут устаноўлены тактыльныя і сэнсарныя элементы, інфармацыйныя стэнды з дубліраваннем шрыфтам Брайля, а таксама створана інфраструктура для камфортнага і бяспечнага перамяшчэння, у тым ліку бяспечны спуск да вады.
Адкрыццё экасцежкі стала наглядным вынікам сумеснай работы нацыянальных і міжнародных партнёраў, накіраванай на развіццё экалагічнага турызму ў Беларусі і стварэнне сучаснай і даступнай турыстычнай інфраструктуры на асабліва ахоўных прыродных тэрыторыях. Рэалізацыя ініцыятывы робіць уклад у дасягненне Рэспублікай Беларусь Мэт устойлівага развіцця 4, 5, 10, 15, 17 і іншых МУР.
Экалагічная сцежка «Падарожжа ў прыроду без перашкод» створана ў рамках праекта «Развіццё экалагічнага турызму для садзейнічання зялёнаму пераходу да інклюзіўнага і ўстойлівага росту», які рэалізуецца Праграмай развіцця ААН (ПРААН) у Беларусі ў партнёрстве з Міністэрствам прыродных рэсурсаў і аховы навакольнага асяроддзя Рэспублікі Беларусь.
КАРТА САЙТА
