8 чэрвеня 2026
Федэрацыя прафсаюзаў Беларусі аб’яўляе аб правядзенні рэспубліканскага конкурсу «Дзелавыя жанчыны», прысвечанага Году беларускай жанчыны. Праект закліканы падкрэсліць ролю жанчын-лідэраў, якія дабіліся значных прафесійных вынікаў і ўнеслі важкі ўклад у развіццё эканомікі і сацыяльнай сферы — як у сваіх арганізацыях, так і ў маштабах усёй краіны.
Конкурс уключае тры намінацыі: «Лепшая бізнес-лэдзі», «Лепшы кіраўнік арганізацыі бюджэтнага сектара» і «Лепшы кіраўнік арганізацыі рэальнага сектара эканомікі».
Галоўная асаблівасць конкурсу — народны фармат вылучэння. Кандыдатак прапануюць працоўныя калектывы. Пры ацэнцы ўдзельніц будуць улічвацца вынікі работы арганізацыі і эфектыўнасць сацыяльнай палітыкі: устойлівае развіццё, стварэнне рабочых месц, рост заработнай платы, развіццё настаўніцтва, наяўнасць калектыўнага дагавора і дадатковыя гарантыі для работнікаў. Асобная ўвага будзе ўдзелена ўзаемадзеянню з прафсаюзнай арганізацыяй і грамадскай актыўнасці — удзелу ў дабрачынных праектах, сацыяльных ініцыятывах і праграмах, накіраваных на развіццё рэгіёнаў і падтрымку людзей.
Дакументы і заяўку на ўдзел у конкурсе неабходна накіраваць у абласную ці Мінскую гарадскую арганізацыю галіновага прафсаюза да 20 жніўня 2026 г.
Больш падрабязна з умовамі конкурсу можна азнаёміцца ў Палажэнні.
Правядзенне рэспубліканскага конкурсу «Дзелавыя жанчыны» ўнясе ўклад у дасягненне Рэспублікай Беларусь Мэт устойлівага развіцця 5, 8, 10 і іншых МУР.
КАРТА САЙТА
